Ovomaghaiti
Actualités

Ayiti/Imigrasyon/Fè Yon paspò vin tounen Yon lanfè

Depi anviwon Yon mwa aprè  prezidan ameriken an Joe BIDEN te fin anonse ak pwop bouch pal pwogram imanitè sila, kote administrasyon l lan ap pèmèt 30 mil migran pami yo ayisyen antre etazini ak Yon estati legal, Yon fason pou anpeche kantite moun ki te konn ap antre sou sol ameriken an de fason ilegal pa fontyè meksik lan.

 

Yon pwogram ke anpil ayisyen akeyi ak anpil efori, e afektyezman yo rele pwogram nan « Pwogram Biden lan » Yon fason pou yo ka montre kontantman yo men san yo pat konnen yo ta pral pase tout mizè sa-a pou yo fè Yon paspò.

 

Jodi samdi 11 fevriye 2023 a nou te vizite youn nan sant kote yo mete pou fè dokiman sa nan Petyonvil, presizeman nan pak Sent Serèz kote nou te arive pale ak kèk moun k ap esplike kalamite yo nan pak lan pou yo fè paspò yo.

 

Marjorie BRUTUS, ki te dakò nou site non’l fè nou konnen jodi an fèl 3 semèn depi l ap mache nan pak Sent Terèz, jiskaprezan li poko janm ka fè paspò pa l lan, entèwoje l sou kisa ki koz li poko janm ka fè paspò pa l lan, ebyen madam BRUTUS, fè konnen, nan pak Sent Terèz se afè ti zanmi k ap regle, si w pa gen moun anndan an l ap difisil pou ou. Marjorie, ale pi lwen pou li denonse kèk polisye ki vini an gwo ponyèt ak moun pa yo, ki tonbe bourade moun ki te deja nan liy pou ka antre ak moun pa yo, non selman sa li denonse kèk anplwaye imigrasyon mal entansyone li di ki pran malen plezi pran kob nan men moun pou antre nan sant lan avek yo.

 

Mesye sa li menm ki te mete yon mayo nwa, yon jeans bleu, ki pat vle non li site, kalifye de mechanste ak abi kèk ajan sekirite ap fè moun kote yo konn menm manke kase ponyèt yo, oswa itilize yon aparey ki bay kouran jis pou fè kote pou antre ak moun pa yo, mesye an pat met dlo nan bouch li pou li kritike responsab imigrasyon yo li di se afè moun pa ak lajan k ap jere Sent Terèz.

 

Madam Jocelyne DUPLAN, ki se yon dam ki nan anviwon senkantèn (50 tèn) yo fè nou konnen pa bò isit pa gen afè liy, ni moun ansent oswa ki aje, se pito mete fanm nan fanm ou oswa gason nan gason w pou pran pwès pou antre, li menm rapòte nou ou ka rive anndan kote pou fè paspò an, y ap mande w kiyes ki voye w, yon fason pou yo fè kòb, madam DUPLAN, fè konnen se kolòn ki bat pa bò isit, epi lajan w ki konte.

 

Poze l kesyon sou kisa li ta swete ki fèt yon fason pou amelyore bagay yo, li di li ta swete responsab yo mete lòd epi pou yo pi sou travay, menmlè li di sa, li konnen l ap difisil paske se moun anndan an yo menm ki kreye dezòd lan pou yo ka fè kòb epi bay sèvis an ti zanmi, pandan gen moun ki konn arive dòmi nan pak lan an pansan y ap gen chans fè paspò a an demen poutan nad marinad, avan menm yo ouvri pou moun antre nan sant lan, anndan koulwa a gentan chaje moun, mande kote yo pase ak kilè yo antre ou pa konnen.

 

Pascal JEAN, li menm ki fache kou kong, pa menaje bouch li ak pawòl piman bouk kont kèk polisye diferant inite nan lapolis lan ak anplwaye imigrasyon yo, kotel di se yon pakèt visye ak sousou yo ye, depi yo fin fè moun pa yo antre pou yo fin sèvi yo aprè yo di w siyal tonbe oswa delko gen pwoblem.

Poze l kesyon sou konbyen jou li genyen depi l ap vin Sent Terèz, Pascal JEAN, fè nou konnen jodi an fè l kenz jou (15 jou) depi l ap leve bonè sot wout frè pou li vini, kote yeswa li oblije dòmi nan pak lan pou li arive pase malgré sa li pa gen chans pase jodi an koz li pa gen lajan, selon sa l di.

 

Nou te eseye chache Jwenn kek responsab pou nou te ka fè ekilib lan, men malerezman se te an ven sa pat arive fèt.

 

N ap soulinye se pa sèlman pou pak Sent Terèz moun yo plenyen pou jan de pratik sila, se pito tout kote nan zone metwopolitèn nan ki gen biwo imigrasyon sitwayen ak sitwayèn yo ap plenyen pou koze sa.

 

Eske alèkile li vin pi fasil pou yon chamo pase nan je yon egwi olye pou yon moun fè yon paspò ? antouka n ap swiv dosye sila.

 

Pou Ovomag: Stéphane EUSTACHE

Related posts

2-0, l’Inter surclasse l’AC Milan et met un pied en finale de la Ligue des champions

Ovo Mag Haiti

Atak ame kont konpayi wòm bakara nan kwadèboukè

Ovo Mag Haiti

Des footballeuses suédoises contraintes de montrer leur vagin pour jouer une Coupe du monde

Ovo Mag Haiti

Une urgence de maturité politique en Haïti

Ovo Mag Haiti

Rihanna veut sortir un album cette année!

Ovo Mag Haiti

Haïti/Hommage/Contesté dans son vivant, aimé après sa mort.

Ovo Mag Haiti

Leave a Comment

Ovomag te propose l'information dans toute son intégralité, des analyses, des reportages et aussi d'autres contenu divertissant!