Samdi kite 20 jiyè 2024 lan, neg a zam pèsòn pa arive idantifye kidnape pwofesè Rony Jean Jacques pandan lap sot fè kou pou timoun NS4 nan yon lekol Delma 31.
Madanm li fè konnen bandi yo mande l gwo kòb ameriken pou ta libere pwofesè an, dam nan ale pi lwen pou l di kòb bandi yo mande a li pa kwè ni li ni mari l ap ka posede l menm si yo ta fè tout rès vi yo ap travay, li rapouswiv pou li mande mesye ki anlve mari l yo pitye, fè pwofesè an gras pou li paske lajan sa yo mande an, fanmi an pap ka jwenn li, e pwofesè Jacques kite l depi samedi an ak 3 timoun nan men l ki pa goute dlo frèt.
Si se vre fòs etranjè an antre nan peyi a, gen chanjman ki opere nan tèt lapolis lan, men sak pa chanje se egzaksyon bandi yo sou popilasyon sivil lan kap monte lesyèl pa do anba men zago loray yo.
N ap souliye se pa selman rejyon metwopolitèn Potoprens lan bandi yo ap feraye, nou ka site nan Latibonit presizeman nan Savyen ak nan komin Pilat kote malfra yo ap frape san gran sousi.
Kesyon k ap poze se jiskilè abraram ap di sètase pou malere ak malerèz anba men neg a zam, ki pa sispann fè yo vann ti sa yo pat menm genyen pou peye ravisè?
Pou OVOMAG: Stéphane EUSTACHE
