Plis pase 100 jou depi arive Garry Conille nan tèt primati an e antake minis enteryè peyi an apre 12 zan li te pase lòtbo dlo, pou anpil moun ki avize li poko poze okenn aksyon ki pou montre li vini ak yon bagay nouvo pou soulaje mas pèp lan anba bandi san fwa ni lwa ki pa sispann mete apse sou klou pi plis chak jou Bondye mete
Si se vre li ta pral repran teritwa pèdi yo vil pa vil, kay pa kay, jiskaprezan anyen poko fèt reyèlman pou ta rekirepe menm on kay alevwa pou yon vil, okontrè gang yo toujou konfòtab nan egzaksyon y ap komèt sou popilasyon sivil lan, se kadav yo fè pèp lan ap konte san rete tankou yo se zanj lanmò.
Pandan PM nan ap fè bel diskou, pale mete la, byen antoure ak ajan sekirite l goumen pou montre se lik sèl kòk chante, popilasyon an pa konn ki sen pou yo rele tèlman zago loray ap fè yo pase tray, lè se pa Gresye se Savyen, se Akayè e aprè demen nou pa konnen ki lòt komin, jis peyi an lage nan gouvènay ak yon kapitèn ki kanpe sou foulay, pandan l ap di l ap fè, men nan li menm li konnen se pawòl dodo titit.
Gwo kesyon ki rete jiskaprezan san respons se: èske Doktè Garry Conille pral pase nan tèt primati an tankou Ariel Henry nan woule ti pèp lan de bò san jamè panche reyèlman sou pwoblèm yo?
Pou OVOMAG : Stéphane EUSTACHE
