Jounen jodiya, anpil jèn gason itilize kèk mo ki, montre yon fason panse ak atitid nan relasyon seksyèl ki merite refleksyon. Egzanp se lè yo itilize tèm “kraze” pou pale de yon rapò seksyèl. Mo sa a pote yon sans vyolan ak destriktif, ki vle di “brize,” “dechire” oswa “detwi.” Nan yon relasyon entim, mo sa a manke tandrès, afeksyon ak respè, li fè aksyon an sanble ak yon konba, tankou yon zak brital san sansiblite.
Okontrè, lè nou di “fè bagay,” sa vle di yon koneksyon entim ak afeksyon ant patnè yo. Li mete aksan sou angajman emosyonèl ak respè. Chwazi di “fè bagay” olye de “kraze” se pa yon senp chwa mo, men yon apwòch ki montre tandrès, afeksyon ak konsantman ant patnè yo, opoze ak vyolans tèm “kraze” a ka fè sonje
Doktè Catherine Solano, yon espesyalis relasyon, te mansyone nan yon emisyon sou Europe 1 : “Lè n ap fè bagay, nou pa chèche yon sèvis; gen yon pataj, se pa sèlman aksyon an ki konte.” Daprè li, sa ki reyèlman enpòtan nan entimite fizik se “kontak somato-psikik la” — yon koneksyon pwofon ant kò ak lespri, ki pèmèt de moun rapwoche youn ak lòt. Li pa kesyon tcheke kaz pou di : “m te dire, m te byen kraze…” Se pa sa ki sans lanmou pataje a, li di.
Malgre sa, anpil jèn gason sanble konsantre sou pèfòmans yo. Enfliyanse pa yon sosyete ki mete anpil enpòtans sou imaj ak virilite, gen kèk ki vin itilize pwodui pou ogmante andirans yo nan relasyon seksyèl yo, konsa yo fè eksperyans lan sanble ak yon “sèvis” kote echanj emosyonèl la absan.
Chwa mo yo gen konsekans. Langaj la enfliyanse fason nou panse. Lè nou pale de “fè bagay,” sa enspire yon vizyon ki respekte ak ki bay valè nan zak entim nan, pandan itilize tèm “kraze” ka fè zak la sanble brital oswa vyolan. Sa ka diminye enpòtans entimite a, fè li sanble ak yon aksyon enstenktif plis pase yon koneksyon emosyonèl reyèl.
Nan yon mond kote mo yo fòme fason nou panse ak konpòte nou, li enpòtan pou nou reflechi sou langaj nou itilize lè nou pale de relasyon entim. Chwazi tèm tankou “fè bagay” montre yon apwòch ki pi mati, ki gen plis respè ak afeksyon pou lòt la.
Pa Bill Witchelson Dier
