Nan kad operasyon plizyè inite nan polis nasyonal lan tankou Utag ak swat ap mennen nan Gresye, gen omwen Venntwa (23) fanm bandi te kidnape epi vyole, fòs lòd yo arive libere, se sa ajan egzekitif enterimè komin lan, Vladimir Bertrand rapòte sou ond radyo Karayib yè mèkredi 24 jiyè 2024 lan.
Medam sa yo, bandi te kidnape yo sa gen plizyè jou pandan yo t ap travèse lokalite an toujou daprè majistra a. Premye sitwayen vil lan rapouswiv pou l di gen swasanndis (70) bandi ki gentan fè vwèl pou peyi san chapo, se twou li oblige fouye pou l met kò yo. Li fè konnen ajan lòd yo rekipere plizyè zam, men lapolis li menm poko bay yon kominike ofisyèl sou operasyon sila.
N ap raple jodi jedi 25 jiyè an fè yon mwa depi fòs miltinasyonal lan pile sòl lan, jiskaprezan pyès moun paka di ki aksyon konkrè yo poze nan peyi an. Okontrè neg ak zam yo kontinye ap opere san okenn krent, Potoprens kou nan Latibonit.
Pou OVOMAG: Stéphane EUSTACHE
