Selon sa radyo télé Métronome rapòte jodi jedi 25 jiyè 2024 lan, gen yon plent fòmèl ki deja depoze bò kot ULCC kont twa (3) manm nan konsèy prezidansyèl lan sou akizasyon yo ta mande 100 milyon goud a aktyèl prezidan konsèy administrasyon BNC an pou yo ta kite l nan pòs li, se sa yon sous nan ULCC konfime medya a.
Si se vre depi lè yo enstale yo poko regle anyen ki serye nan peyi an, men deja gen anpil anpil rimè k ap sikile sou integrite sèten manm konsèy la, sòti nan dekese pil kòb pou achte machin blennde pou yo woule rive sou koze sila, manm konsèy tranzisyon 9 tèt lan pa enspire ti pèp lan twòp konfyans nan ajisman yo nan peyi an.
N ap raple selon menm sous sa Métronome fè konnen sèvis konpetan yo deja sezi de dosye an pou bay avi yo a direksyon jeneral lan, ki dwe konnen si l ap nesesè pou yo ouvri yon ankèt kont twa(3) manm sa yo pou dwèt long siperyè.
Gwo kesyon k ap poze eske ULCC pral arive vini ak pwèv pou montre mesye yo t ap benyen nan koripsyon vre, jan rimè an ta vle fè kwèl lan??
Pou OVOMAG: Stéphane EUSTACHE
