Anne Ketia Georges, Jean Ralph Antoine, Jean Juniot Memnon ak Lifete Leevens Dejoie se non 4 anplwaye SOGEBANK lapolis ap chèche tankou chen fou, pou vòl, abi konfyans ak asosyasyon malfektè pou’n site sa yo sèlman.
Daprè nòt enstitisyon polisyè a pibliye jodi vandredi 19 me 2023 a, mezi sa yo pran kèk jou aprè arestasyon St Paul Daphkar, ki se sipèvizè kès ak Catheline Barochid, ki se direktris operasyon pou detouneman lajan kliyan SOGEBANK yo, yon sòm ki estime a 132 mil dola ameriken. 2 anplwaye sa yo deja anba kòd depi jedi 4 me 2023, aprè ankèt DCPJ swit a plizyè plent kèk kliyan depoze nan biwo zafè finans ak ekonomik BAFE.
Lapolis envite popilasyon an pou yo kolabore epi founi bon jan enfòmasyon ki kapab mennen ak arestasyon endividi sa yo.
