Gang ame yo touye plis pase 2800 moun nan peyi a sòti jiyè 2021 pou rive avril 2023
2845 moun pèdi lavi yo nan 16 masak ak atak ame, plizyè milye moun kouri kite kay yo soti jiyè 2021 pou rive mwa avril 2023 nan katye popilè yo ak kèk lòt zòn nan rejion metwopolitèn nan, daprè yon rapò Fondasyon je klere (FJK) pibliye madi 2 me ki sot pase a.
Daprè rapò sa, masak ak atak ame sa yo fèt nan Site Solèy, Solino, Bèlè, Laplèn, Bitbwaye, Santo, Taba, Pènye, Fèmat, Tomasen, Laboul Meyòt, Malik, Sous Matla, Kanaan, Kwadèboukè, Lyankou, Vèrèt, Debisi, Ti Rivyè Latibonit, Lestè ak anpil lòt kote.
Òganizasyon k ap defann dwa moun nan, denonse vyolans sa yo e rann gouvènman Ariel Henry an responsab, paske wòl otorite yo se pwoteje dwa epi asire sekirite popilasyon an. N ap raple depi lè gang yo fin pran peyi an, plizyè biwo leta delokalize.
