Daprè medya Enquet’Action, Polis Nasyonal Dayiti (PNH) an kolaborasyon ak patnè entènasyonal li yo kreye diskrètman yon inite elit ki rele UTAG, Inite Tanporè Anti-Gang, nan lide pou anpeche gwoup ame kontinye ap simen laterè nan peyi a.
Popilasyon ayisyèn lan ap viv yon vrè kochma akòz gwo vyolans gang ame ki kontinye ap grandi nan peyi a. Nan efò pou konbat gwoup sa yo, ki kontwole plizyè katye nan peyi a, inite espesyalize tou nèf sa a ap resevwa fòmasyon nan men fòmatè inite elit Lafrans la, Rechèch, Asistans, Entèvansyon ak Diswazyon (RAID), se sa Enquêt’Action rapòte.
Si otorite yo nan lapolis la pa fè okenn anons ofisyèl nan medya konsènan kreyasyon Inite Tanporè Anti-Gang (UTAG) la, se reprezantan Sekretè Jeneral Òganizasyon Nasyonzini an Ayiti a, Helene La Lime ki mansyone li, pandan l baze sou yon rapò enstitisyon li a te reyalize sou sitiyasyon peyi nan mwa oktòb 2022. Men li pat site inite a klèman.
Nouvèl fòs espesyalize sa a, ki gen yon efektif 150 polisye, amelyore pèfòmans polis la epi ranfòse kowòdinasyon entèn yo, dapre rapò Nasyonzini an, Enquet’Action te konsilte. « Fòs sila a, ki te gen manm li yo ki sibi tout chèk davans ki nesesè yo, epi kap ranfòse gras ak don materyèl ak fòmasyon, ta dwe pase a 300 ajan polis, » daprè dokiman an.
Selon ajans anliy la, ki refere li ak sa ki nan rapò Nasyonzini an, fòs sa a ta kreye byen anvan oktòb 2022. Daprè enfòmasyon medya a rive jwenn nan kad rechèch li yo sou dosye sa a, UTAG ta deja patisipe nan gwo operasyon nan peyi a.
