Nan yon nòt li poste sou rezo sosyal yo, Primati repiblik la ki gen nan tèt li premye minis Alix Didier Fils Aimé anonse yo mobilize plis pase yon milya goud pou ride popilasyon ayisyèn nan pandan peryòd fèt yo.
Toujou daprè nòt primati a, pwogram sa se pou ede fanmi ki pi vilnerab yo, ankouraje relansman ekonomik epi ranfòse fratènite nan mitan popilasyon an.
Avèk plis pase yon milya goud, gouvènman espere pote asistans pou fanmi ki nan sitiyasyon difisil nan distribiye kit alimantė ak transfé lajan bay fanmi ki pi afekte yo, an premye pou moun aje, moun andikape ak fanm ki chèf fanmi yo. Aksyon sa yo ap fèt anba kowòdinasyon Ministé Afè Sosyal ak Travay (MAST) epi Fon Asistans Ekonomik ak Sosyal (FAES), selon sa nou li nan nòt la.
Atravè menm pwogram sa, gouvènman an swete mete kantin mobil ak restoran kominotè pou bay yon pla cho nan plizyè lokalite, netwayaj ak enfrastrikti vil yo, ranfòse sekirite ak lojistik, soutni sektè enėji ak agrikilti.
Pou rapèl, se pa premye fwa gouvènman ayisyen lanse jan de pwogram sa yo ki souvan pa rive jwenn moun ki pi vilnerab yo vre. Pifò kòb sa yo, anpil fwa al nan pòch dirijan nan ministè yo ak de patikilye.
