Rezo nasyonal kap defann dwa moun RNDDH, denonse nan yon rapò zanmitay ki genyen ant chèf gang baz kraze baryè a Vitelhomme Innocent ak kèk wo grade nan lapolis la ak gouvènman an.
Daprè rapò sila, chèf gang nan gen yon kòtèj ki genyen veyikil ofisyèl ak sèvis leta pou fasilite deplasman l yo. Òganizasyon dwazimen an fè konnen Vitelhomme gen yon pikòp Toyota doub kabin ki imatrikile 1-01191, selon RNDDH ki se machin lapolis.
Rezo nasyonal kap defann dwa moun nan revele, jou ki te 16 jiyè 2023 a yon douzèn veyikil ki pote plak sèvis leta ak ofisyèl, te rann yo nan fyèf Vitelhomme pou rankont ki te dire plizyè èd tan. Daprè RNDDH, depi aprè rankont sa kalvè popilasyon kwadèboukè, petyonvil, delma ak taba kòmanse, Vitelhomme vin pi wouye pi koupe.
Yon sitiyasyon ki preyokipe sosyete ayisyèn nan, moun ki la pou pwoteje ak sèvi ou nan konnivans ak gang, moun ki pou pran desizyon pou sekirize lavi ou, se yo ki gen manet ensekirite jeneralize a. RNDDH egzote otorite ayisyèn yo, pou pran mezi prese, prese pou limyè jayi sou alegasyon sa yo, epi asire sekirite ak pwoteksyon sitwayen yo fas a monte ensekirite a, yon fason pou reyabli konfyans pèp la nan enstitisyon li yo.
